ئەمڕۆ چوارشەممە ٢٥ی نیسانی ٢٠١٨، لە بینای کۆلێژی پەروەردەی بنەڕەت لە شاری قەڵادزێ کارەکانی چوارەمین کۆنفرانسی زمان و ئەدەبیاتی کوردی و فارسی لە ئاوێنەی هزر و کەلتوری ئاریدا بەڕێوەچوو.

لە دووەمین ڕۆژی کۆنفرانسەکەدا (١٧) توێژینەوەی زانستی لەبوارەکانی زمان و ئەدەبی کوردی و فارسی لەلایەن (٢٣) توێژەری ناوخۆیی و بیانی پێشکەشکران، کە تیایدا شارەزایان و پسپۆرانی بواری زمان و ئەدەب گەنگەشەیەکی تێر و تەسەلیان دەربارەی توێژینەوەکان کرد.

ئەم کۆنفرانسە زانکۆی راپەڕین بە هاوبەشی زانکۆی کوردستان-سنە لە ساڵوەگەڕی کارەساتی بۆردوومانی قەلادزێ و ڕۆژی شەهیدی زانکۆدا وەک چوارەمین کۆنفرانسی خۆی لەژێر دروشمی (زمان و ئەدەبیاتی کوردی و فارسی لە ئاوێنەی هزر و کەلتوری ئاریدا) ڕێکیخستووە، کە تیایدا (٤١)توێژەری ناوخۆیی و بیانی بە ( ۳۰) توێژینەوەی زانستی لەبوارەکانی زمان و ئەدەبی کوردی و فارسی بەشداری دەکەن.

كۆنفرانسەكە ماوەی سێ ڕۆژ بەردەوام دەبێت، بەپێی کارنامەی کۆنفرانس سبەی پێنج شەممە لە پانێڵی حەوتەمدا سێ توێژینەوە لە بواری ئەدەبی کوردی و فارسی پێشکەش دەکرێن.