دیداری: شوان وەسانی
پڕۆفیسۆری یاریدەدەر (دكتۆر هێرش رەسوڵ)، یاریدەدەری سەرۆكی زانكۆی راپەڕین بۆ كاروباری خوێندكاران، لە چاوپێكەوتنێكی رۆژنامەوانییدا باس لە چەندین پرسی تایبەت بە خوێندكاران و كردنەوەی بەشی تازەو پلانی ئایندەی زانكۆی راپەڕین دەكات.
سەرەتا و ئێستای زانکۆ
سەرەتا سەربارەت بە مێژووی زانكۆی راپەڕین (پ.ی.د.هێرش رەسوڵ) یاریدەدەری سەرۆكی زانكۆی راپەڕین، وتی "زانكۆی راپەڕین بە شێوەیەكی رەسمی ساڵی (٢٠١٠) دامەزراوە، بەڵام بناغەكەی دەگەڕێتەوە بۆ ئەو كۆلێژانەی پێشتر لە رانیەو قەڵادزێ كرابوونەوە و سەر بە زانكۆی كۆیە بوون، سەرەتا كۆلێژی زانستە مرۆڤایەتییەكان بووە، و دواتریش كۆلێژی زمان و پەروەردە لەقەڵادزێ كرانەوە، دواتریش كۆلێژی پەرستاریش لە رانیە.

لە درێژەی قسەكانیدا، راشیگەیاند، پاش بەرەوپێشبردنی ئەم سێ كۆلێژە، دواتر حكومەتی هەرێمی كوردستان لە چوارچێوەی بایەخدان بە خوێندنی باڵا بڕیاڕیدا لە چەند ناوچەیەك زانكۆی نوێ بكاتەوە، زانكۆی راپەڕینیش یەكێك بوو لەو زانكۆیانەو كرایەوە. لە ئێستاشدا زانكۆكەمان دوو كەمپەسی هەیە، كەمپەسی سەرەكی لە شاری رانیەیە و گەورەترە، و كەمپەسێكیش هەیە لە شاری قەڵادزێ، بە گشتیش زانكۆی راپەڕین لەپێنج كۆلێژ پێكدێت، كە بریتین لە كۆلێژەكانی (زانستە مرۆڤایەتییەكان، پەروەردە، پەرستاری، پەروەردەی بنەڕەت و زانست)، هەروەها سێ بەشیش سەربەخۆن تائێستا هەر سەر بەسەرۆكایەتی زانكۆن و هیچ چوارچێوەیەكی كۆلێژیان نیە، ئەوانیش بەشەكانی (ئەندازیاریی شارستانی لەكەمپەسی رانیەو هەردوو بەشی باخداری و سامانی ئاژەڵیی لە كەمپەسی قەڵادزێ)، لە كۆی ئەم پێنج كۆلێژو سێ بەشە زانستییە، بە گشتی (21) بەشمان هەیە لەخوێندنی بەیانییان، و (14) بەشیش لە خوێندنی ئێواران، تێكڕای هەموو ئەو بەشانە دەكاتە (24) بەش، كە تائێستا لە زانكۆی راپەڕین خوێندن تێیایاندا بەردەوامە.
زانكۆی راپەڕین (٥٣١١) خوێندكاری هەیە
یاریدەدەری سەرۆكی زانكۆی راپەڕین، دەربارەی كۆی گشتیی خوێندكارانی زانكۆكەیان دەڵێت "كۆی گشتیی خوێندكارانمان لە ئێستادا (٥٣١١) خوێندكارە، لەم رێژەیەش (٤٢٤٦) خوێندكار لە خوێندنی بەیانیان، و (١٠٦٥) خوێندكاریش لە خوێندنی ئێوارانن، ئەگەر لەسەر ئاستی رەگەزیش جیای بكەینەوە، لەخوێندنی بەیانیان ژمارەی خوێندكارانی كچمان زیاترە، و لە ئێوارانیش كوڕان زیاترن.
سەبارەت بە خوێندنی ساڵی (٢٠١٧-٢٠١٨) ناوبرارو ئاشکرایكرد، بۆ ئەمساڵی خوێندن، (٩٤٢) خوێندكار بە چەند سیستمێكی جیاواز وەرگیراون، كە دابەشكراوە بەسەر خوێندنی (راستەوخۆی زانکۆیی، زانکۆلاین، پاراڵێڵ، ئێواران)، ئەوانەی كە بە سیستمی راستەوخۆی زانكۆیی وەرگیراون بەسەر (١٤) بەشی زانستیدا دابەشبوون، و زانكۆلاین-یش پێنج بەش بووە، لەكۆلێژو بەشەكانی (ئەندازیاری شارستانی، پەرستاری، كیمیاو بایۆلۆجی، یاسا) كە (٢١٣) خوێندكاریان بەو سیستەمە وەرگیراون، ئەوەی دەشمێنیێتەوە هەر بۆ ئەمساڵی خوێندن، لەو (٩٤٢) خوێندكارەی باسمان كرد، ئێوارانمان هەیە كە (٤٠٦) خوێندكار لە خوێندنی ئێواران وەرگیراون، و بە پاراڵێڵ-یش كە خوێندنی هاوتەریبە لەگەڵ ئاستی خوێندنی بەیانیان (٤٥) خوێندكار لەكۆی گشتی وەرگیراوانی ئەمساڵدایە.
پلانی كردنەوەی كۆلێژو بەشی نوێ هەیە
سەبارەت بەكردنەوەی بەشی تر كە بۆ ئایندەی سنورەكە گرنگ بێت، د.هێرش رەسوڵ ئاشكرایكرد، لە هەوڵی ئەوەدان دوو بەشی زۆر زیندوو لەو زانكۆیە بكەنەوە و گرنگی پێبدەن، ناوبراو دەڵێت "خۆم زۆر كارم لەسەر کردوە و بۆئایندەش بەردەوام دەبم، ئەو دوو بەشە لەگەڵ سروشتی ناوچەكە زۆر گونجاون، یەكەمیان بەشی (شوێنەوار)ە، كە ئێمە خاوەنی پێگەیەكی بەرزی شوێنەواریین لەم سنورەو بەردەوام شارەزایانی بیانی و تیمە بیانییەكان كار لەسەر شوێنەوارەكانی سنورەكە دەكەن و كنەو پشكنینیان بۆ دەكەن، زۆر شوێنەواری گرنگ و دەگمەنیشیان دۆزیونەتەوە، دووەمیان، بەشی (گەشتوگوزار)ە، كە ئەم ناوچەیە بە سروشتی خۆی زۆر لەبارە بۆ بواری گەشتوگوزار، بۆیە دەمانەوێت ئەو بەشانە بكەینەوە، یان پێكەوە بیانگونجێنین، بۆ ئەوەی زیاتر گەشە بەو دوو كەرتە بدرێت، بۆ ناوچەكەش ببێتە سەرچاوەیەكی تری بوژانەوە، و لەئایندەدا هەوڵی جدیتری بۆ دەدەین و دەیانكەینەوە.
ناوبراو ئاماژەی بەوەشدا، لەگەڵ بەڕێوەبەرایەتیی گشتیی تەندروستیی راپەڕین كاریان لەسەر كردوە، ئەویش كۆلێژی پزیشكی گشتییە، كە ئەمە دەستكەوتێكی زۆر گەورەیە بتوانن لەساڵانی ئایندەدا كاری جێبەجێی بکەن، چونکە ژمارەیەكی پزیشكی خاوەن بڕوانامەی ماستەر و دکتۆرا لە ناوچەكەدا هەن، و دەتوانن سودیان لێوەربگرن، بەڵام نەخۆشخانەی فێركاری پێویستە. وتیشی "چاومان لەوەیە حكومەتی هەرێمی كوردستان، ئەو نەخۆشخانە گەورەیەی كە لە چەند ساڵێکە لە رانیە دەستی پێکردوە تەواوی بكات و بە گشتی سوودی بۆ ناوچەكەو زانكۆش دەبێت و دەتوانین ئەوكاتە كۆلێژی پزیشكی بكەینەوەو سوود لەو نەخۆشخانەیە وەرگرین.
"كار بۆ كردنەوەی بەشی راگەیاندن كراوە"
سەبارەت بە كردنەوەی بەشی (راگەیاندن) لەز انكۆی راپەڕین كە ماوەیەك سەرقاڵی كردنەوەی بوون، یاریدەدەری سەرۆكی زانكۆی راپەڕین بۆ كاروباری خوێندكاران باسی لەوەكرد، بەردەوام زانكۆ پلانی خۆی هەیە بۆ ئەوەی گەشەبكات، و هەوڵمانداوە لە زانكۆی راپەڕین ژمارەیەك بەشی نوێ و هەمەچەشن بكەنەوە، وەك ئەوەی لە چوار ساڵی رابردوودا چەند بەشێكیان كردەوە بۆ خوێندنی بەیانیان و ئێواران، لەوانە بەشەكانی (ئەندازیاریی شارستانی، ، سامانی ئاژەڵ، باخداری، پەروەردە و دەرونزانی) لەبەیانیان، و لە خوێندنی ئێوارانیش بەشەكانی (كارگێڕی، زانستە كۆمەڵایەتییەكان و زانستی گشتی) كراونەتەوە، بێگومان بەشی راگەیاندن-یش لەپلاندایە بۆئەوەی بكرێتەوە، پێشتر پرۆپۆزەڵمان بۆی ئامادەكردبوو و ئێستاش ئامادەیە، بەڵام گرفتێك بۆ بەشی راگەیاندن هەیە، ئەویش نەبوونی میلاكی پێویستە، بە تایبەت مامۆستا، كە بەپێی رێنماییەكانی وەزارەتی خوێندنی باڵاو توێژینەوەی زانستی ژمارەی هەڵگرانی بڕوانامەی دكتۆراو ماستەر دەبێت لە پڕۆپۆزەڵی بەشەكەدا هەبن و لەناو زانكۆكەدا میلاك بن، بەڵام زانكۆی راپەڕین میلاكی پێویستی لەمامۆستایان نییە لە پسپۆڕی راگەیاندن، ئەوەش گرفتی سەرەكیە كە ناتوانن بەشی راگەیاندن لەئێستادا بكەنەوە.
داواكاریی خوێندن بەردەوام لەهەڵكشادایە
سەبارەت بە قەیرانی دارایی و دابەزینی خواست لەسەر خوێندن یاریدەدەری سەرۆكی زانكۆی راپەرین، رایدەگەیەنێت، بە شێوەیەكی گشتی داواكاریی بۆ خوێندن بەردەوام لەهەڵكشاندایە، بەڵام بەدڵنیاییەوە بارودۆخی دارایی كاریگەریی خۆی هەیە، بەتایبەتی بۆ خوێندنی ئێواران، چونكە بۆ ئێواران كە رێژەكە كەمترە، خوێندن بەپارەیە، بەڵام خوێندنی بەیانییان تائێستا لەزانكۆ حكومییەكان بەخۆڕاییە، بۆیە ئەوەی كە هەیە بەپێچەوانەوە لە هەڵكشاندایە، نەك دابەزین، چونكە بیرمان نەچێت، ئەگەر سەیری رێژەی دەرچوانی پۆلی دوانزەی ئامادەیی بكەین لەسنوری راپەرین، واتا سنوری هەردوو بەڕێوەبەرایەتیی پەروەردەی رانیەو پشدەر، رێژەیەكی زۆرە، ئەمەش ناچارمان دەكات كە باس لەگرفتێكی تر بكەین، دیارە لەناوچەكەدا وەكو ناوەندێكی ئەكادیمی بۆ خوێندنی باڵا تەنها زانكۆی راپەڕینمان هەیە، نە هیچ زانكۆیەكی تری حكومی و ئەهلی، و نە هیچ پەیمانگایەكی حكومی و ئەهلی نییە، بۆیە لەو (٢٤) بەشەی لە بەیانیان و ئێواران هەمانە، لۆدێكی زۆرمان لەسەرە، زۆرجار لەبەر رەچاوكردنی باری دارایی و هەندێك بارودۆخی تری خوێندكاران و هاوڵاتییانی ناوچەكە، بە تایبەت كێشەی دارایی، ناچاربووین فشار بكەینەسەر بەشەكانمان، كە خوێندكاری زۆرتر لە بەشەكان وەربگرن، بەڵام ئەمەش نابێت هەمیشە وا بڕوات، چونكە لەسەر ئاستی زانستیی زانكۆمان دەكەوێت، و كاریگەریی نەرێنی دەبێت بۆ سەر زانكۆ، كە هیوادارین بۆ ساڵانی ئایندە، لەم ناوچەیەدا بەشی ترو زانكۆی تری ئەهلی و حكومی بكرێتەوە، بۆئەوەی ئێمەش ناچارنەبین كواڵێتیی بەشەكان دابەزێنین، و هەم تۆزێك ئەو بارگرانییەش لەسەرشانی ئێمەو خوێندكاران و تەنانەت هاونیشتمانانی ناوچەكەش نەمێنێت، كە هەندێك بەش لەوانەیە لای ئێمەش نەبێت كە خوێندكار ناوی دەگەڕێتەوە، ناچارنەبێت بچێتە زانكۆی تری كوردستان و بتوانێت لێرە بخوێنێت.
كەموكوڕییەكانی سیستمی راستەوخۆی زانکۆیی ناهێڵین
دەربارەی سیستمی راستەوخۆی زانکۆیی، کە وەرگرتنی خوێندكارانی پۆلی (١٢)ی ئامادەیی ئێستا پەیڕەو دەكرێت، د. هێرش رەسوڵ یاریدەدەری سەرۆكی زانكۆ، باس لەوەدەكات كە یەكەمجار لەساڵی (٢٠١٦-٢٠١٧) لەهەر زانكۆیەك چەند بەشێكی كەمبوو كە دەیانتوانی بەو جۆرە سیستمە خوێندكار وەربگرن، زانكۆی راپەڕین سێ بەشی هەبوو، ئەویش بەشەكانی عەرەبی لە كۆلێژەكانی پەروەردەو پەروەردەی بنەرەت، و بەشی فەلسەفە لە كۆلێژی زانستە مرۆڤایەتییەكان، لەزانكۆكانی تریش هەریەكەو بەو شێوەیە بەشی كەمیان هەبوو، كە كۆی گشتی نزیكەی (١٠٦) بەش بوو لەسەر ئاستی هەرێمی كوردستان، بەڵام لەمساڵی خوێندنی (٢٠١٧-٢٠١٨) ئەو رێژەیە زیادكراو نزیككرایەوە لە (٤٠٠) بەش، بەو جۆرە ئەمە هەنگاوێكی گەورەتر بوو، و بەدڵنیایی هەموو سیستمێكی تازەش كەموكوڕی هەیە، بەڵام ئەگەر بەگشتی بەراورد بكرێت لەگەڵ وەرگرتنی ناوەندیدا، رەنگە سیستمی راستەوخۆ باشتر بێت، لەبەرئەوەی ئەوجۆرە لەوەرگرتنی خوێندكاران كەوتۆتەسەر خواست و لێهاتوویی خوێندكار، لەو بەش و پسپۆڕییەی تێیدا دەخوێنێت، بۆیە بە بڕوای من لایەنی ئەرێنی زیاترە، هەوڵیشمانداوە سەرنج و پێشنیازەكانمان بەرز بكەینەوە بۆ وەزارەت، لە رێگەی ئەو لیژنەیەی هەمانە، كە لیژنەی خوێندن و پلانی وەرگرتنەو خۆشمان تێیدا ئەندامین، بۆیە بۆ دەوڵەمەندكردنی زیاتری ئەو شێوە وەرگرتنە دەتوانین سەرنج و پێشنیازەكان بگەیەنین، و زیاتر تاووتوێی بكەین، بۆ ئەوەی ئەو كەموكوڕییانەی هەبووە بتوانین نەیهێڵێین، سیستمی وەرگرتنی راستەوخۆی زانكۆیی زۆر باشتر بێت لە ساڵانی پێشتر.
پارە لە خوێندكارانی بەشەناوخۆییەكان وەرناگیرێت
سەبارەت بە كێشەو گرفتی بەشەناوخۆییەكان، یاریدەدەری سەرۆكی زانكۆ پێیوتین: بەشێوەیەكی گشتی (١١٣١) خوێندكارمان هەیە لەهەر سێ بەشە ناوخۆیی كوڕان و كچان لە كەمپەسەكانی رانیەو قەڵادزێ، ئەم رێژەیەش زۆرەو بەشە ناوخۆییەكانمان پڕبوون لە خوێندكار، جاری واش هەبووە ناچاربووین لە ژوورەكان خوێندكار زیاد بكەین، بەڵام ئەوەی كە هەیە لەئێستادا بۆ ئەمساڵی خوێندن كرێی بەشە ناوخۆییەكان لەخوێندكار وەرناگیرێت لە خوێندنی بەیانیان، ئەو (١٠٠) هەزار دینارەی پێشتر وەردەگیرا لەبری مانەوەی خوێندكار ئێستا راگیراوەو دواتر ئەنجومەنی وەزارەتی خوێندنی باڵا بڕیاری لێدەدات، ئاخۆ دەمێنێتەوە یا كەمدەكرێتەوە یا بەتەواوی لادەبرێت، ئەوە دەكەوێتە سەر وەزارەتی خوێندنی باڵا كە خۆیان چ بڕیارێك لەبارەیەوە دەدەن، ئەوانەی لای خۆشمان كە لەبەشە ناوخۆییەكان دەمێننەوە لەو (١١٣١) خوێندكارە ، ژمارەیەكی زۆر كەم خوێندكارانی ئێواران و پاراڵێڵن، ئەوەش بەپێی رێنماییەكان كرێی نیشتەجێبوون و مانەوەیان لێوەردەگیرێت، بەڵام ئەوانەی تر بێبەرامبەر دەمێننەوە لەبەشە ناوخۆییەكان، دەشتوانم بڵێم، بەردەوام هەوڵمانداوە خزمەتگوزارییەكان بەشێوەیەكی باش و رێكوپێك دابینبكەین و ئەمنییەتی بەشە ناوخۆییەكانیش بپارێزین، هەر كەموكوڕی و كێشەو گرفتێكیش هەبێت، دەرگامان كراوەیە بۆ خوێندكاران و دەتوانن سەردانمان بكەن و كێشەكانیان باس بكەن.
"نامانەوێت كەشی زانكۆ تاقەتپڕۆكێنەرو وشك بێت"
سەبارەت بە ئەنجامدانی چالاكییە هونەریی و رۆشنبیریی و زانستیی و وەرزشییەكانی زانكۆش، د. هێرش رسوڵ روونیكردەوە، هەوڵمانداوە، ژینگەی زانکۆ تەنها بریتی نەبێت لە خوێندن و تاقیکردنەوە، بەڵکو چالاكیی زانستی و کەلتوریی ناوازەش بۆ خوێندكاران سازبکەین. هۆبەی چالاكیی رۆشنبیری و وەرزشی سەر بەفەرمانگەی یاریدەدەرێتیی سەرۆكی زانكۆیە بۆ كاروباری خوێندكاران، و یەكێكە لەو هۆبانەی كە جێی خۆشحاڵییە لە زانكۆمانداو ئەكتیڤەو بەردەوام چالاكیی جۆراوجۆری كەلتوری و رۆشنبیری و وەرزشی هەیە، چ بۆ ناوخۆی زانكۆ چ بۆ دەرەوە، هەروەها میوانداریكردنی تیپ و هەڵبژاردە جیاوازەكانی زانكۆكانی تر، و بەهەمانشێوە سازدانی سیمینار و پانێڵ و چالاكیی جیاواز، كە زۆربەی كات بە هاوكاری بەڕێوەبەرایەتیی راگەیاندن، یان بەش و کۆلێژ و بەڕێوەبەرایەتیتەكانی تری ناو زانكۆ، دیدارو كۆنفرانس و پانێڵ و سیمینار و چالاكیی جیاواز رێكدەخات، تەنانەت ئێمە هەندێك پڕۆژەی ناوەزەشمان هەیە كە ئێستا بەڕێوەبەرایەتیی راگەیاندن سەرپەرشتیدەكات، وەكو: نمایشكردنی هەفتانەی فیلم، كە ئەمە یەكەمجارە لە زانكۆكانی كوردستان ئەوجۆرە چالاکییە پێشكەش بكرێت، جگەلەوەش رۆژێكی ترمان هەیە، كە هەموو سێشەممەیەك بە بڕیاری ئەنجومەنی زانكۆ، لە كاتژمێر (١٠ بۆ ١٢:٣٠) ی نیوەرۆ رێستمان داناوەو لەو كاتەدا هیچ وانەیەك ناخوێندرێت، ئەو رێستەش كە دانراوە بۆ چالاكی دانراوە، واتا لەخشتەی وانەكانیشدا نوسیومانە (چالاكیی خوێندكاران)، كە بەردەوام سیمینارو پانێل و كۆنفرانس، یان چالاكیی تایبەت بە خوێندكاران هەیە، ئینجا چ خەڵك بێنین، چ مامۆستا، یان هەر كەسێك بۆ چالاكییەكە، بۆیە ویستوومانە كەشی زانكۆ نەبێتە كەشێكی تاقەتپڕۆكێنەر و وشك، تەنها وانەخوێندن و تاقیكردنەوەو ئەنجامدانی توێژینەوە بێت، بەڵكو لایەنی رۆشنبیری و وەرزشیشی تێدابێت، بۆیە لێرەوە داوا لە خوێندكاران دەكەم، بەشداری ئەكتیڤ و بەرچاویان هەبێت.
فێستیڤاڵی رۆژی زانكۆ
یاریدەدەری سەرۆكی زانكۆ بۆ كاروباری خوێندكاران، ئەوە ئاشكرا دەكات، كە بۆ ئەمساڵ لە بەرنامەیاندایە فێستیڤاڵێكی گەورەو شایستە بە بەشداریی سەرجەم بەش و كۆلێژەكانی زانكۆی راپەڕین بۆ ساڵیادی دامەزراندنی زانكۆ راپەڕین، واتە رۆژی زانكۆ كە (٤/٤) دەكات رێكبخەن، لە هەردوو كەمپەسی رانیەو قەڵادزێ. دەشڵێت "ئەم فێستیڤاڵانە پێشتر بە شێوەی جیا جیاو لە سەر ئاستی بەشەكان دەكران، بەڵام هەوڵمانداوە ئەمساڵ كۆیبكەینەوە و هەمووی یەكبخەین و چالاكییەكی گەورە سازبکەین و شتی ناوازەی تێدا پێشكەشبكەین، كە چالاكییەكان لە رێگەی لیژنەیەكی باڵاوە هەڵدەبژێردرێن بۆ ئەو رۆژە، بۆئەوەی زیاتر بتوانین خوێندکاران و خەڵكی دەرەوەی زانكۆش ئاشنا بن بە زانكۆ، و بەرهەم و بەخشش و کار و چالاکییەکانی".
بایەخی زیاتر بە توێژینەوەی خوێندكاران دەدرێت
سەبارەت بە (كۆنفڕانسی زانستیی خوێندكاران)، د.هێرش رەسوڵ ئەوەی خستەڕوو، كە ئەو كۆنفڕانسە یەكێكە لەو چالاكیانەی كە جێی شانازییە بۆ زانكۆی راپەڕین، پێویستە هەمووان شازنازی پێوە بكەن، چونكە یەكێكە لەو چالاكییانەی لەسەر ئاستی زانكۆكان دەگمەنە، و هەوڵیانداوە (توێژینەوەی دەرچوون) چیتر توێژینەوە نەبێت تەنها بۆ وانەیەك و بۆ نمرەهێنان، یان توێژینەوەكان دوای گفتوگۆكردن لەلایەن لیژنەكان بخرێتە رەفەیەكەو دوایی لەناوببرێن، یان بخرێنە كۆگاكانەوە، بەڵكو دەمانەوێت ئەو توێژینەوەیەی كە خوێندكار دەیكات، بخرێتەڕوو و خەڵك بیبینێت و بڵاوبكرێتەوە، و سوود لە دەرەنجام و پێشنیازو راسپاردەكانیان وەربگیرێت، بۆیە بە شێوەی كۆنفڕانسێك ساڵی رابردوو لە نۆبەرەی چالاكییەكەدا، داوامان لەبەشەكان كرد لە هەر بەشێك یەك توێژینەوەمان بۆ دیاری بكەن و ئەو خوێندكارە، یان ئەو گروپە خۆشیان پێشكەشی بكەن، ئەوەبوو توانرا سەركەوتوو بین، كە بۆ ئەمساڵیش بە نیازین دوومین كۆنفڕانسی زانستی بۆ توێژینەوەی دەرچوونی خوێندكاران رێكبخەین، و هەوڵیشدەدەین جیاواتربێت و رێژەی زیاتری خوێندكاران بە توێژینەوە بەشداری پێبكەین، هەوڵیشدەدەین مامۆستاكان، ئەوانەی سەرپەرشتی توێژینەوەی خوێندكاران دەكەن، لەمەودا ئاستێكی بەرزتری خوێندكاران رەچاوبكەن.
(گروپی كۆمەكی زانكۆ) خزمەتێكی بەرچاو بە خوێندكاران دەكەن
(گروپی كۆمەكی زانكۆ)، گروپێكی خۆبەشییە لە زانكۆی راپەڕین، لەو بارەیەشەوە یاریدەدەری سەرۆكی زانكۆی راپەرین، وردەكاریی زیاتر دەخاتەڕو و دەڵێت "ئەو گروپە ساڵێكە دامەزرێنراوە، كۆمەڵێك خوێندكار بە خۆبەخش كار لەو گروپەدا دەكەن بۆ كۆكردنەوەی كۆمەك بۆ خوێندكارە كەمدەرامەتەكان، و ئێمە تەنیا لە دوورەوە چاودێریان دەكەین و پشتگیریان دەكەین، چونكە كارەكەی ئەوان لە بنچینەدا بۆ خزمەتی خوێندكارانە، ئەوان بۆ دوو ئەركی سەرەكی كارەكانی خۆیانیان دابەشكردووە، یەكەمیان: كۆكردنەوەی پارە لە خەڵكانی مرۆڤدۆست و خێرخواز، و دوەمیان: بەخشینی بە خوێندكاری كەمدەرامەت، بە دڵنیاییش خزمەتی باشیانكردووەو دەستخۆشیان لێدەكەین، كە لە رێگەی ئەوانەوە توانراوە سوود لە كۆمەڵێك خەڵكی مرۆڤدۆست و خێرخواز وەرگرین، وەكو زانكۆش كە جێی خۆیەتی ئاماژەی پێ بكەم، هەندێك لەو خێرخوازانە بە شێوازی جیا جیا هاوكاریی زانكۆیان كردووە.
(رێبەری خوێندكارانی زانكۆ) نوێدەكەینەوە
د. هێرش رەسوڵ، دەربارەی رێبەری خوێندكارانی زانكۆی راپەڕین روونیكردەوە، كە (رێبەری دەرچوان) ساڵانە بەچاپدەگەیەنن، و زانیاریی وردی بە وێنەی خوێندكارو مامۆستایانەوە تێدایە، ئەوانەی لەو ساڵەدا دەردەچن، ئەو زانیارییانەش لە رێگەی بەشەكانەوە وەردەگیرێت، لەو رێبەرەشدا نوسراوە هەر كەموكوڕییەك هەبێت لەناو و داتای خوێندكارو تاد.. ئەوە بەش خۆی لێی بەرپرسە، بە نمونە ئەگەر وێنەیەك دانەنرابێت، یان كەسێكی زیادە لەوێنەكاندا دەركەوتبێت و زانیاریی هەڵە نوسرابێت، ئێمە لەسەر بنەمای زانیاریی ئەو بەش و كۆلێژانە ئەو رێبەرە ئامادەدەكەین، جگەلەوەش، رێبەرێكی ترمان هەیە، كە (رێبەری خوێندكارانی زانكۆی راپەڕین)ە، تائێستا بەئۆنلاین لەسەر سایتی زانكۆ هەیە، كە دوو ساڵ لەمەوبەر دروستكراوە، زانیاری سەبارەت بە زانكۆو بەشەكان و پەیکەری سەرۆكایەتیی زانكۆ هەیە، و هەندێك رێنمایی و یاسای پێویست بۆ خوێندكارانی تێیدا روونكراوەتەوە، بۆ ئەوەی كە خوێندكار دێتە زانكۆ بەرچاوڕونیی هەبێت، تەنانەت لەبەشەكاندا ئاماژەی بە دید و پەیام و ئامانجی بەشەكەو دەرفەتی دەرچووانی بەشەكە كردووە، بەوجۆرەی كاتێك خوێندكار ئەو بەشە تەواو دەكات دەتوانێت لەكوێ كار بكات، ئەمانەو زۆر شتی تر رونكراوتەوە، و هەوڵی نوێكردنەوەی ئەو رێبەرەش دەدەین و زانیاریی نوێی تێدا دەنوسین.
دەرگامان بۆ خوێندكاران كراوەیە
سەبارەت بە كێشەو كەموكوڕیی خوێندكاران، د. هێرش رسوڵ دەڵێت "پۆستی یاریدەدەری سەرۆكی زانكۆ بۆ كاروباری خوێندكاران هەر بۆ ئەوە دانەنراوە تەنیا واژۆی نوسراوەکان بكات، بەدڵنیایی بۆ ئیشوكاری وردی خوێندكاران و چارەسەری گرفتەكانیان و راییكردنی كارەكانیانە، كە وەرگرتن و پلان و شوێنگۆڕین و گواستنەوەو هەموو ئەوانە كێشەو گرفتی زۆر هەیە، بەڵام توانیومانە تا ئەندازەیەكی زۆر بەسەر ئەو كێشەو گرفتانەدا زاڵ بین، و ئەوەی پەیوەندی بە كێشەو گرفتی رۆژانەی خوێندكارانیشەوە هەیە، لەگەڵ مامۆستایان و بەشەكەی، یان لەگەڵ هاوڕێكەی و تاد، دێنە لامان، سكاڵایان هەیەو ئێمە بەوردی بەدواداچوونی بۆ دەكەین و چارەسەری بۆ دەدۆزینەوە، هەمیشەش دەرگامان بە رووی خوێندكاران كراوە بووەو كراوەش دەبێت بۆ داوا رەواكانیان، ئەو كێشانەی كە بە فیعلی غەدر لە خوێندكار كرابێت".
زانكۆی راپەرین خزمەتی زۆری كردووە
لە كۆتاییدا، پ. ی. د. هێرش رەسوڵ، یاریدەدەری سەرۆكی زانكۆی راپەڕین بۆ كاروباری خوێندكاران، وەك كەسێكی پسپۆڕو ئەكادیمی لە بواری خوێندنی باڵادا، باس لە ئەزموون و خزمەت و سەركەوتنی زانكۆی راپەرین لە ماوەی دامەزراندن تاكو ئێستا دەكات. ناوبراو دەڵێت "من بۆ ماوەی (٤) ساڵە لەو زانكۆیە كاردەكەم، و تەمەنی زانكۆكەش نزیكەی (٨) ساڵە، بۆیە دەبێت خەڵكی تر لەدەرەوە ئەو هەڵسەنگاندنە بۆ زانكۆ بكات، خۆم وەك نوسەرێك، یان مامۆستاو ئەكادیمییەك دەیبینم، بەڵێ خزمەتی كردووە، ئینجا ئەو خزمەتە چۆن و چی بووەو لەچ ئاستێك بووە، ئەوە توێژینەوە و راپۆرت و بەدواداچوون دەریدەخات، بەڵام بە گشتی خزمەتی كردووەو چاوەڕێدەكەین كە خزمەتی زیاتر بكات و دوای ئێمەش كە خەڵكێك دێت لە شوێنی ئێمە ئیش دەكات، هەوڵی بەرەوپێشبردنی زیاتری زانكۆ بدات.