University of Raparin Logo

دیداری "قەڵەمێکی ئازا" لە زانکۆی ڕاپەڕین بەڕێوەچوو

چاپکردن ئیمەیڵ

ئەمڕۆ سێشەممە ۲۳ی ئایاری ۲۰۱۷، بەشی فەلسەفە لە زانکۆی ڕاپەڕین، دیداری "قەڵەمێکی ئازا" بۆ کەسایەتی ناسراوی بواری ئەدەب و مێژوو (میرزا مەنگوڕی) سازکرد.

بە ئامادەبوونی (د. موفق خالد) سەرۆکی زانکۆ و ئەندامانی ئەنجومەنی زانکۆ و کەسوکاری بیرمەندی گەورە میرزا مەنگوڕی و ژەمارەیەک لە مامۆستا و خوێندکارانی زانکۆ، لە بەرامبەر هەڵوێست و کارەکانی لە بواری ئەدەب و مێژوودا، بەشی فەلسەفە دیدارێکی بۆ کەسایەتی ناسراو میرزا مەنگوڕی بەناونیشانی "قەڵەمێکی ئازا" سازکرد.

لە سەرەتای دیدارەکەدا (د. هێرش رسول) وتەیەکی بەناوی سەرۆکایەتی زانکۆ پێشکەشکرد، وێڕای بەخێرهاتنی سەرجەم ئامادەبووان و بنەماڵەی میرزا مەنگوڕی نەمر، سوپاسی بەشی فەلسەفەی کرد بۆ ڕێکخستنی دیدارەکە، وتی مەنگوڕی لە ئەدیب و نوسەرە پێشەنگەکانی کوردە، مێژووی ئەدەب و ڕۆشنبیری کوردی ئەو ڕاستیەی سەلماندووە کە مەنگوڕی هەر زوو دەستی بە کاری سیاسی و ئەدەبی و ڕۆشنبیری کردووە، چەندان نوسینی لەو بوارانەدا هەبووە، بەڵام جێگەی داخە، کە مێژوو غەدرێكی گەورەی لەو بیرمەندەی دەڤەرەکەمان كردووە و بەشێكی زۆری بەرهەم ‌و هەڵوێستەكانی لەلای نەوەی نوێ‌ تا ئێستاش بە شاراوەیی ماوەتەوە، وەك پێویست رۆشنایی نەخراوەتە سەر کار و بەرهەمەکانی ئەو ڕۆشنفکرە، وتیشی: مەنگوڕی لەسەر بیروڕای ئازاد لەساڵانی سییەکانی سەدەی ڕابردوودا لەسەر نوسینی كتێبی "هەنگاوێك بۆ سەركەوتن" دادگایی دەكرێت‌ و بۆ ماوەی شەش مانگ زیندانی دەكرێت لەگەڵ سووتانی بەرهەمەكە، وتیشی هیوادارین بەم دیدارە بتوانین پەڕەیەک لە هەڵوێست و کارە ئەدەبیەکانی ئەو قەڵەمە بوێرە هەڵبدەینەوە .

پاشان لە دوو پانێڵی دیدارەکەدا (۷) بابەت لەسەر هەڵوێست و کارە ئەدەبیەکانی مەنگوڕی پێشکەشی ئامادەبووان کران .

ناونیشانی بابەتەکانی پانێڵی یەکەمی دیداری "قەڵەمێکی ئازا" بۆ میرزا مەنگوڕی .

(م. ئارام قادر صابر ، م. هیمداد محمود حمەصالح) بابەتێکیان دەربارەی (مەنگوڕی، هزرێکی ڕۆشنگەر، جیهانێکی ئازا بەنمونە) پێشکەشکرد.

(م. ئەڤین ئاسۆس حمە) بابەتێکی دەربارەی (ئامادەگی ژن لەنێو دەقە ئەدەبییەکانی مەنگوڕیدا) پێشکەشکرد .

(جمال حسێن رحیم) بابەتێکی دەربارەی ( خوێندنەوەیەک بۆ کتێبی هەنگاوێک بۆ سەرکەوتن) پێشکەشکرد.

(د. دارا تۆفیق کاکەمین) بابەتێکی دەربارەی ( خوێندنەوەیەک بۆ میتۆدی نوسینەوەی مێژوو لای میرزا مەنگوڕی) پێشکەشکرد.

بابەتەکانی پانێڵی دووەمی دیدار

(د. مسلم حسن محمد ، سەرکەوت رسول حسن) بابەتێکیان دەربارەی (دیدی میرزا مەنگوڕی بۆ مرۆڤ) پێشکەشکرد.

(نیازی حمە عزیز) بابەتێکی دەربارەی (دیوێکی دیکەی مەنگوڕی) پێشکەشکرد .

(م. عمر ولی فیزی) بابەتێکی دەربارەی (خوێندنەوەیەکی مارکسیستیانە بۆ کتێبی ئەستێرەی مەریخ) پێشکەشکرد.

لە کۆتایی دیدارەکەدا خەڵاتی بنەماڵەی مەنگوڕی ئەدیب بەخشرایە سەرۆکایەتی زانکۆی ڕاپەڕین.

کلیک بکە بۆ بینینی ڕاپۆرتی ڤیدیۆیی لەسەر دیدارەکە